0:00
/
1ܘܗَܘܹܐ ܠܵܗ̇ ܒܐܵܢܝܼ ܝܵܘܡܵܢܹ̈ܐ: ܘܦܠܸܛܠܹܗ ܦܘܼܩܕܵܢܵܐ ܡ̣ܢ ܐܵܓ̣ܘܼܣܛܘܿܣ ܩܹܣܲܪ: ܕܦܵܝܫܵܐ ܡܘܼܟܬܸܒ̣ܬܵܐ ܟܠܵܗ̇ ܕܘܼܢܝܹܐ. 2ܐܵܗܵܐ ܡܲܟܬܲܒ̣ܬܵܐ ܩܵܕَܡܵܝܬܵܐ ܗَܘܹܐ ܠܵܗ̇ ܒܗܵܟܝܼܡܘܼܬܵܐ ܕܩܸܘܪܝܼܢܘܿܣ ܒܣܘܼܪܝܼܵܐ. 3ܘܐَܙܸܠܗܘܿܢ ܟܠܵܝܗܝ ܕܦܵܝܫܝܼ ܡܘܼܟܬܸܒܹܐ: ܟܠ ܐ݇ܢܵܫܵܐ ܠܡܕܝܼܢَܬܹܗ. 4ܘܐ݇ܣܸܩܠܹܗ ܐܘܼܦ ܝܵܘܣܸܦ ܡ̣ܢ ܓܠܝܼܠܵܐ: ܡ̣ܢ ܡܕܝܼܢَܬܵܐ ܕܢܵܨܪܲܬ: ܠܝܼܗܘܼܕ: ܠܡܕܝܼܢَܬܹܗ ܕܕܵܘܝܼܕ: ܕܦܝܵܫܵܐ ܝ݇ܠܵܗ̇ ܩܪܝܼܬܵܐ ܒܹܝܬܠܚܸܡ: ܣܵܒܵܒ ܕܡ̣ܢ ܒܲܝܬܹܗ ܘܡ̣ܢ ܐܘܼܓ̰ܵܓܹܗ ܕܕܵܘܝܼܕ ܝܼܗ݇ܘܵܐ. 5ܥܲܡ ܡܲܪܝܲܡ ܛܠܝܼܒܬܹܗ: ܟܲܕ ܒܛܝܼܢܬܵܐ: ܕܦܵܐܹܫ ܡܘܼܟܬܸܒ̣ܵܐ. 6ܘܗَܘܹܐ ܠܵܗ̇ ܕܟܲܕ ܐܵܢܝܼ ܬܵܡܵܐ ܗ݇ܘܵܘ: ܦܸܫܠܗَܘܿܢ ܬܘܼܡܸܡܹܐ ܝܵܘܡܵܢܘܼ̈ܗ̇ ܕܝܵܠܕܵܗ̇ ܗ݇ܘܵܐ. 7ܘܝܠܸܕܠܵܗ̇ ܒܪܘܿܢܵܗ̇ ܒܘܼܟ̣ܪܵܐ: ܘܟܘܼܪܡܸܟ̣ܠܵܗ̇ ܐܸܠܹܗ ܒܒܲܢܕܹ̈ܐ: ܘܡܘܼܬܸܒ̣ܠܵܗ̇ ܐܸܠܹܗ ܒܐܘܼܪܹܐ: ܣܵܒܵܒ ܕܠܲܝܬ ܗ݇ܘܵܐ ܠܗ݇ܘܿܢ ܕܘܼܟܬܵܐ ܓܵܘ ܒܹܝܬ ܡܲܫܪܝܵܐ. 8ܘܪ̈ܵܥܝܹܐ ܐܝܼܬ ܗ݇ܘܵܘ ܒܗ̇ܘ ܐܲܬܪܵܐ: ܫܸܪܝܹܐ ܒܚܲܩܠܵܐ: ܘܒܸܢܛܵܪܵܐ ܒܲܕܠܹ̈ܐ ܕܠܲܝܠܹܐ ܥܲܠ ܦܸܣܩܵܝܗܝ. 9ܘܗܵܐ: ܡܲܠܲܐܟ̣ܵܐ ܕܡܵܪܝܵܐ ܟܠܹܠܹܗ ܠܟܸܣܠܵܝܗܝ: ܘܬܸܫܒܘܿܚܬܹܗ ܕܡܵܪܝܵܐ ܒܘܼܗَܪܸܢܵܐ ܚܵܕܸܪ̈ܘܵܢܵܝܗܝ: ܘܙܕܸܥܠܗܘܿܢ ܙܕܘܿܥܬܵܐ ܓܘܼܪܬܵܐ. 10ܘܐَܡܝܼܪܹܗ ܐܸܠܵܝܗܝ ܡܲܠܲܐܟ̣ܵܐ: ܠܵܐ ܙܵܕܥܝܼܬܘܿܢ: ܣܵܒܵܒ ܗܵܐ: ܡܲܫܚܘܼܕܹܐ ܝܘܸܢ ܐܸܠܵܘܟ̣ܘܿܢ ܚܲܕܘܼܬܵܐ ܓܘܼܪܬܵܐ ܕܒܸܬ ܗܵܘܝܵܐ ܠܟܠ ܛܵܝܸܦܵܐ. 11ܣܵܒܵܒ ܕܦܸܫܠܹܗ ܝܠܝܼܕܵܐ ܐܸܠܵܘܟ̣ܘܿܢ ܐܸܕܝܘܿܡ ܦܵܪܘܿܩܵܐ: ܕܝܼܠܹܗ ܡܫܝܼܚܵܐ ܡܵܪܝܵܐ: ܓܵܘ ܡܕܝܼܢَܬܹܗ ܕܕܵܘܝܼܕ. 12ܘܐܵܗܵܐ ܐܸܠܵܘܟ̣ܘܿܢ ܢܝܼܫܲܢܩܵܐ: ܒܸܬ ܡܲܫَܟ̰ܚܝܼܬܘܿܢ ܝܵܠܵܕَܐ ܟܘܼܪܡܸܟ̣ܵܐ ܒܒܲܢܕܹ̈ܐ ܘܡܘܼܬܒ̣ܵܐ ܒܐܘܼܪܹܐ. 13ܘܡܸܢܫܸܠܬܵܢܹܐ ܗَܘܹܐܠܹܗ ܥܲܡ ܡܲܠܲܐܟ̣ܵܐ ܒܘܼܫܵܝܝܼ ܕܚܲܝܠܵܘܵܬܹ̈ܐ ܕܫܡܲܝܵܐ ܫܵܒܘܿܚܹܐ ܠܐܲܠܵܗܵܐ: ܘܒܹܐܡܵܪܵܐ: 14ܬܸܫܒܘܿܚܬܵܐ ܠܐܲܠܵܗܵܐ ܒܡܪ̈ܵܘܡܹܐ: ܘܥܲܠ ܐܲܪܥܵܐ ܫܠܵܡܵܐ: ܘܣܲܒ̣ܪܵܐ ܛܵܒ̣ܵܐ ܠܒܢܲܝ̈ܢܵܫܵܐ. 15ܘܗَܘܹܐ ܠܵܗ̇: ܟܲܕ ܐَܙܸܠܗܘܿܢ ܡܲܠܲܐܟܹ̈ܐ ܡ̣ܢ ܠܟܸܣܠܵܝܗܝ ܠܫܡܲܝܵܐ: ܗܘܼܡܙܸܡܠܗܘܿܢ ܪ̈ܵܥܝܹܐ ܚܲܕَ ܥܲܡ ܕܗ̇ܘ ܐ݇ܚܹܪ݇ܢܵܐ: ܐܵܙܵܠَܚ ܗܲܠ ܒܹܝܬܠܚܸܡ: ܘܚܵܙܵܚ ܠܐܵܗܵܐ ܡܸܢܕܝܼ ܕܗَܘܹܐܠܹܗ: ܗ̇ܘ ܕܡܵܪܝܵܐ ܩܲܡ ܡܲܕܸܥܠܲܢ. 16ܘܐ݇ܬܹܐܠܗܘܿܢ ܒܝܲܠܙܘܼܝ: ܘܡܘܼܫَܟ̰ܸܚܠܗܘܿܢ ܠܡܲܪܝܲܡ ܘܠܝܵܘܣܸܦ: ܘܠܝܵܠܵܕَܐ ܡܘܼܬܒ̣ܵܐ ܒܐܘܼܪܹܐ. 17ܘܟܲܕ ܚܙܹܐܠܗܘܿܢ: ܡܘܼܕܸܥܠܗܘܿܢ ܠܗܹܡܸܙܡܵܢ ܕܦܸܫܠܵܗ̇ ܗܘܼܡܙܸܡܬܵܐ ܥܲܡܵܝܗܝ ܒܘܼܬ ܕܐܵܗܵܐ ܝܵܠܵܕَܐ. 18ܘܟܠܵܝܗܝ ܕܫܡܸܥܠܗَܘܿܢ ܥܘܼܓ̰ܸܒܠܗܘܿܢ ܥܲܠ ܕܐܵܢܝܼ ܕܦܸܫܠܗَܘܿܢ ܗܘܼܡܙܸܡܹܐ ܐܸܠܵܝܗܝ ܡ̣ܢ ܪ̈ܵܥܝܹܐ. 19ܐܝܼܢܵܐ ܡܲܪܝܲܡ ܢܵܛܪܵܐ ܗ݇ܘܵܐ ܐܲܢܹܐ ܗܹܡܸܙܡܵܢܹ̈ܐ ܟܠܵܝܗܝ: ܬܲܚܡܘܼܢܹܐ ܥܲܠܵܝܗܝ ܒܠܸܒܘܼܗ̇. 20ܘܕܸܪܗܘܿܢ ܐܵܢܝܼ ܪ̈ܵܥܝܹܐ: ܟܲܕ ܫܵܒܘܼܚܹܐ ܘܡܵܣܘܼܩܹܐ ܗܲܠܸܠܘܼܝܵܐ ܠܐܲܠܵܗܵܐ ܥܲܠ ܟܠ ܕܚܙܹܐܠܗܘܿܢ ܘܫܡܸܥܠܗَܘܿܢ: ܕܵܐܟ̣ܝܼ ܕܦܸܫܠܹܗ ܗܘܼܡܙܸܡܵܐ ܥܲܡܵܝܗܝ. 21ܘܟܲܕ ܬܘܼܡܸܡܠܗܘܿܢ ܬܡܵܢܝܵܐ ܝܵܘܡܵܢܹ̈ܐ ܕܦܵܐܹܫ ܗ݇ܘܵܐ ܓܙܝܼܪܵܐ ܝܵܠܵܕَܐ: ܦܸܫܠܹܗ ܩܸܪܝܵܐ ܫܸܡܹܗ: ܝܼܫܘܿܥ: ܕܩܸܪܝܵܐ ܗ݇ܘܵܐ ܡ̣ܢ ܡܲܠܲܐܟ̣ܵܐ ܡܩܵܕَܡ ܕܦܵܐܹܫ ܗ݇ܘܵܐ ܒܛܝܼܢܵܐ ܒܟܹܪَܣܵܐ. 22ܘܟܲܕ ܦܸܫܠܗَܘܿܢ ܬܘܼܡܸܡܹܐ ܝܵܘܡܵܢܹ̈ܐ ܕܕܵܟ̣ܵܝܬܵܝܗܝ: ܐܲܝܟܼ ܢܵܡܘܿܣܵܐ ܕܡܘܼܫܹܐ: ܡܘܼܣܸܩܠܗܘܿܢ ܐܸܠܹܗ ܠܐܘܿܪܸܫܠܸܡ: ܕܡܲܩܸܡܝܼ ܗ݇ܘܵܘ ܠܹܗ ܩܵܕَܡ ܡܵܪܝܵܐ. 23ܐܲܝܟܼ ܕܝܼܠܹܗ ܟܬܝܼܒ̣ܵܐ ܒܢܵܡܘܿܣܵܐ ܕܡܵܪܝܵܐ: ܟܠ ܐܘܼܪܙܵܐ ܦܵܬܚܵܢܵܐ ܕܡܲܪܒܥܵܐ: ܩܲܕܝܼܫܵܐ ܕܡܵܪܝܵܐ ܒܸܬ ܦܵܐܹܫ ܩܸܪܝܵܐ. 24ܘܝܵܗَܒ̣ܝܼ ܕܸܒ̣ܚܵܐ ܕܐܵܟ̣ܝܼ ܕܝܼܠܹܗ ܐَܡܝܼܪܵܐ ܒܢܵܡܘܿܣܵܐ ܕܡܵܪܝܵܐ: ܚܲܕَ ܙܵܘܓܵܐ ܕܓܘܼܪ̈ܓܘܼܡܹܐ: ܝܲܢ ܬܪܹܝ ܙܲܥܝܹ̈ܐ ܕܝܵܘܢܵܐ. 25ܘܗܵܐ: ܐܝܼܬ ܗ݇ܘܵܐ ܚܲܕَ ܐ݇ܢܵܫܵܐ ܓܵܘ ܐܘܿܪܸܫܠܸܡ: ܫܸܡܹܗ ܫܸܡܥܘܿܢ: ܐܵܗܵܐ ܐ݇ܢܵܫܵܐ ܟܹܐܢܵܐ ܗ݇ܘܵܐ ܘܙܲܕܝܼܩܵܐ: ܘܒܸܣܦܵܪܵܐ ܠܝܵܗَܒܲܠܬܵܐ ܕܠܸܒܵܐ ܕܝܼܣܪܵܝܹܠ: ܘܪܘܼܚܵܐ ܕܩܘܼܕܫܵܐ ܥܲܠܘܼܗܝ ܗ݇ܘܵܐ. 26ܘܦܝܼܫܵܐ ܗ݇ܘܵܐ ܓܸܠܝܵܐ ܐܸܠܹܗ ܡ̣ܢ ܪܘܼܚܵܐ ܕܩܘܼܕܫܵܐ: ܕܠܹܐ ܚܵܙܹܐ ܗ݇ܘܵܐ ܡܵܘܬܵܐ: ܡܩܵܕَܡ ܕܚܵܙܹܐ ܗ݇ܘܵܐ ܠܡܫܝܼܚܹܗ ܕܡܵܪܝܵܐ. 27ܘܐَܬܹܐܠܹܗ ܒܪܘܼܚܵܐ ܠܗܲܝܟܠܵܐ. ܘܟܲܕ ܡܲܥܒܼܘܼܪܹܐ ܗ݇ܘܵܘ ܐܲܒ̣ܵܗܘܼ̈ܗܝ ܠܝܼܫܘܿܥ ܝܵܠܵܕَܐ: ܕܥܵܒ̣ܕܝܼ ܡܒܵܕܵܠܹܗ ܕܵܐܟ̣ܝܼ ܕܝܼܠܹܗ ܦܩܝܼܕܵܐ ܒܢܵܡܘܿܣܵܐ. 28ܫܩܸܠܹܗ ܥܲܠ ܕܪ̈ܲܥܢܵܢܘܼܗܝ: ܘܫܘܼܒܸܚܠܹܗ ܠܐܲܠܵܗܵܐ: ܘܐَܡܝܼܪܹܗ: 29ܡܐܵܕܝܼܵܐ ܫܪܝܼ ܠܪܹܓܘܼܟ: ܝܵܐ ܡܵܪܝܵܐ: ܐܲܝܟܼ ܗܹܡܸܙܡܵܢܘܼܟ: ܒܫܠܵܡܵܐ: 30ܣܵܒܵܒ ܕܚܙܹܐܠܗܘܿܢ ܥܲܝܢܝܼ̈ ܦܘܼܪܩܵܢܘܼܟ: 31ܗ̇ܘ ܕܗܘܼܕܸܪܘܼܟ ܒܦܵܬܵܐ ܕܟܠܵܝܗܝ ܡܸܠܲܬܹ̈ܐ: 32ܒܲܗܪܵܐ ܠܓܸܠܝܵܢܵܐ ܠܛܵܝܸܦܹ̈ܐ: ܘܚܸܩܪܵܐ ܕܛܵܝܸܦܘܼܟ ܝܼܣܪܵܝܹܠ. 33ܘܝܵܘܣܸܦ ܘܝܸܡܹܗ ܥܵܓ̰ܒܝܼ ܗ݇ܘܵܘ ܥܲܠ ܕܐܵܢܝܼ ܕܦܵܝܫܝܼ ܗ݇ܘܵܘ ܗܘܼܡܙܸܡܹܐ ܒܵܗَܣܹܗ. 34ܘܒܘܼܪܟ̣ܵܝܠܹܗ ܫܸܡܥܘܿܢ: ܘܐَܡܝܼܪܹܗ ܠܡܲܪܝܲܡ ܝܸܡܹܗ: ܗܵܐ: ܐܵܗܵܐ ܡܘܼܬܒ̣ܵܐ ܝܠܹܗ ܠܢܦܵܠܬܵܐ ܘܠܩܝܵܡܬܵܐ ܕܪܵܒܵܐ ܒܝܼܣܪܵܝܹܠ: ܘܠܢܝܼܫܲܢܩܵܐ ܕܡܲܩܲܪܵܨܘܼܬܵܐ. 35ܘܒܓܵܢܵܐ ܕܝܼܵܟ̣ܝ ܒܸܬ ܥܵܒ̣ܪܵܗ̇ ܪܘܼܡܚܵܐ: ܕܦܵܝܫܝܼ ܓܸܠܝܹܐ ܚܘܼܫܵܒܹ̈ܐ ܕܪܵܒܵܐ ܠܸܒܵܘܵܬܹ̈ܐ. 36ܘܐܝܼܬ ܗ݇ܘܵܐ ܚܲܢܵܐ ܢܒ̣ܝܼܬܵܐ: ܒܪܵܬܹܗ ܕܦܢܘܼܐܹܝܠ: ܡ̣ܢ ܫܲܒ̣ܛܵܐ ܕܐܵܫܹܝܪ: ܐܘܼܦ ܗ̇ܝ ܥܒܸܪܬܵܐ ܗ݇ܘܵܐ ܒܝܵܘܡܵܢܹ̈ܐ ܪܵܒܵܐ: ܕܫܲܒܲܥ ܫܸܢܹ̈ܐ ܥܲܡ ܓܲܒ̣ܪܘܼܗ̇ ܚܹܝ݇ܠܵܗ̇ ܡ̣ܢ ܒܬܘܼܠܘܼܬܘܼܗ̇. 37ܘܗَܘܹܐ ܠܵܗ̇ ܐܲܪܡܸܠܬܵܐ ܐܲܝܟܼ ܬܡܵܢܝܼ ܘܐܲܪܒܲܥ ܫܸܢܹ̈ܐ: ܘܠܹܐ ܦܵܪܩܵܐ ܗ݇ܘܵܐ ܡ̣ܢ ܗܲܝܟܠܵܐ: ܘܒܨܵܘܡܵܐ ܕܨܠܘܿܬܵܐ ܦܵܠܚܵܗ̇ ܗ݇ܘܵܐ ܒܐܝܼܡܵܡܵܐ ܘܠܲܝܠܹܐ. 38ܘܐܘܼܦ ܗ̇ܝ ܩܸܡܠܵܗ̇ ܒܗ̇ܝ ܣܵܥܲܬ ܘܫܘܼܟܸܪܵܗ̇ ܠܡܵܪܝܵܐ: ܘܗܲܡܙܸܡܵܐ ܗ݇ܘܵܐ ܒܘܼܬ ܕܝܹܗ ܥܲܡ ܟܠܵܝܗܝ ܕܒܸܣܦܵܪܵܐ ܗ݇ܘܵܘ ܠܦܘܼܪܩܵܢܵܐ ܕܐܘܿܪܸܫܠܸܡ. 39ܘܟܲܕ ܬܘܼܡܸܡܠܗܘܿܢ ܟܠ ܡܸܢܕܝܼ ܐܲܝܟܼ ܕܒܢܵܡܘܿܣܵܐ ܕܡܵܪܝܵܐ: ܕܸܪܗܘܿܢ ܠܓܠܝܼܠܵܐ: ܠܢܵܨܪܲܬ ܡܕܝܼܢَܬܵܝܗܝ. 40ܐܝܼܢܵܐ ܝܵܠܵܕَܐ ܓܲܪܘܸܣ ܗ݇ܘܵܐ: ܘܦܵܐܹܫ ܗ݇ܘܵܐ ܚܘܼܠܸܢܵܐ ܒܸܡܠܵܝܵܐ ܥܵܩܸܠܕܵܪܘܼܬܵܐ: ܘܫܵܦܵܩܲܬ ܕܐܲܠܵܗܵܐ ܥܲܠܘܼܗܝ ܗ݇ܘܵܐ. 41ܘܐܲܒ̣ܵܗܘܼ̈ܗܝ ܒܟܠ ܫܹܢَܬܵܐ ܟܹܐ ܐܵܙܠَܝܼ ܗ݇ܘܵܘ ܠܐܘܿܪܸܫܠܸܡ ܒܥܹܐܕܵܐ ܕܦܸܨܚܵܐ. 42ܘܟܲܕ ܗَܘܹܐܠܹܗ ܒܲܪ ܬܪܸܥܣܲܪ ܫܸܢܹ̈ܐ: ܐܣܸܩܠܗܘܿܢ ܐܲܝܟܼ ܥܵܕܲܬ ܕܥܹܐܕܵܐ. 43ܘܟܲܕ ܬܘܼܡܸܡܠܗܘܿܢ ܝܵܘܡܵܢܹ̈ܐ: ܐܝܼܡܲܢ ܕܒܸܕܝܵܪܵܐ ܗ݇ܘܵܘ: ܝܼܫܘܿܥ ܝܵܠܵܕَܐ ܦܸܫܠܹܗ ܓܵܘ ܐܘܿܪܸܫܠܸܡ: ܘܐܲܒ̣ܵܗܘܼ̈ܗܝ ܠܵܐ ܝܕܸܥܠܗܘܿܢ. 44ܐܝܼܢܵܐ ܟܲܕ ܒܸܚܫܵܒ̣ܵܐ ܕܥܲܡ ܚܲܒ̣ܪ̈ܵܘܵܬܵܝܗܝ ܗ݇ܘܵܐ: ܐ݇ܬܹܐܠܗܘܿܢ ܐܘܼܪܚܵܐ ܕܚܲܕَ ܝܵܘܡܵܐ: ܘܛܸܥܠܗܘܿܢ ܐܸܠܹܗ ܠܟܸܣ ܐܢܵܫܵܝ̈ܗܝ: ܘܠܟܸܣ ܡ̇ܢ ܕܟܹܐ ܝܵܕܸܥ ܗ݇ܘܵܐ ܠܗ݇ܘܿܢ. 45ܘܠܵܐ ܡܘܼܫَܟ̰ܸܚܠܗܘܿܢ ܐܸܠܹܗ: ܘܕܸܪܗܘܿܢ ܡܸܢَܕܪܸܫَ ܠܐܘܿܪܸܫܠܸܡ: ܘܛܵܥܝܼ ܗ݇ܘܵܘ ܒܵܬَܪܹܗ. 46ܘܗَܘܹܐ ܠܵܗ̇: ܡܒܵܬَܪ ܬܠܵܬَܐ ܝܵܘܡܵܢܹ̈ܐ ܡܘܼܫَܟ̰ܸܚܠܗܘܿܢ ܐܸܠܹܗ ܓܵܘ ܗܲܝܟܠܵܐ: ܝܬܝܼܒ̣ܵܐ ܒܓܵܘܵܐ ܕܡܲܠܦܵܢܹ̈ܐ: ܘܫܵܡܹܥ ܗ݇ܘܵܐ ܡܸܢܵܝܗܝ: ܘܒܵܩܸܪ ܗ݇ܘܵܐ ܠܗ݇ܘܿܢ. 47ܘܥܵܓ̰ܒܝܼ ܗ݇ܘܵܘ ܟܠܵܝܗܝ ܐܵܢܝܼ ܕܫܵܡܥܝܼ ܗ݇ܘܵܘ ܠܹܗ: ܒܥܵܩܸܠܕܵܪܘܼܬܹܗ ܘܒܓ̰ܘܼܘܵܒܹ̈ܗ. 48ܘܟܲܕ ܚܙܹܐܠܗܘܿܢ ܐܸܠܹܗ ܥܘܓ̰ܸܒܠܗܘܿܢ: ܘܐَܡܝܼܪܵܗ̇ ܐܸܠܹܗ ܝܸܡܹܗ: ܒܪܘܿܢܝܼ: ܩܵܡܘܿܕܝܼ ܥܒܸܕܠܘܼܟܼ: ܐܸܠܲܢ ܗܲܕܟ̣ܵܐ: ܗܵܐ ܐܵܢܵܐ ܘܒܵܒܘܼܟ ܒܥܹܩܘܝܼ ܒܸܛܲܥܝܵܐ ܝܘܵܚ ܗ݇ܘܵܘ ܐܸܠܘܼܟܼ. 49ܐܵܡܸܪ ܐܸܠܵܝܗܝ: ܩܵܡܘܿܕܝܼ ܒܸܛܲܥܝܵܐ ܝܬܘܿܢ ܗ݇ܘܵܘ ܐܸܠܝܼ: ܠܹܐ ܝܬܘܿܢ ܒܝܼܕܵܥܝܵܐ ܕܓܵܘ ܫܘܼܠܵܐ ܕܒܵܒܝܼ ܘܵܓ̰ܸܒ ܝ݇ܠܵܗ̇ ܐܸܠܝܼ ܕܗܵܘܸܢ. 50ܐܝܼܢܵܐ ܐܵܢܝܼ ܠܵܐ ܦܘܼܪܡܹܠܗܘܿܢ ܠܗܹܡܸܙܡܵܢ ܕܐَܡܝܼܪܹܗ ܐܸܠܵܝܗܝ. 51ܘܨܠܹܐܠܹܗ ܥܲܡܵܝܗܝ ܘܐَܬܹܐܠܹܗ ܠܢܵܨܪܲܬ: ܘܙܲܒܛ ܝܼܗ݇ܘܵܐ ܐܸܠܵܝܗܝ. ܘܝܸܡܹܗ ܢܵܛܪܵܗ̇ ܗ݇ܘܵܐ ܟܠܵܝܗܝ ܐܲܢܹܐ ܗܹܡܸܙܡܵܢܹ̈ܐ ܒܠܸܒܵܗ̇. 52ܘܝܼܫܘܿܥ ܙܵܝܸܕ ܗ݇ܘܵܐ ܒܩܘܼܡܬܹܗ ܘܒܥܵܩܸܠܕܵܪܘܼܬܹܗ: ܘܒܫܵܦܵܩܲܬ ܠܟܸܣ ܐܲܠܵܗܵܐ ܘܒܢܲܝ̈ܢܵܫܵܐ.